ቤተክርስቲያኒቱ ከባለፈው የበለጠ ብርቱ ፈተና እየመጣባት ነው። መሳይ መኮነን

ከወዲያ ሰሜን ሸዋ አጣዬ ዙሪያ፡ ማጀቴና አከባቢው የአብይ ሰራዊት የጭካኔ በትሩን ከምንጊዜውም በላይ እያሳረፈ ነው። የእምነት ቦታዎች አልቀሩም። የአርሶ አደሮች መኖሪያ ቤቶች እንደካልሲ እየተገለበጡ እየተበረበሩ ነው። በእርሻ ማሳቸው ላይ ያሉ ገበሬዎች ሞፈርና ቀንበር እንደያዙ ተደብድበዋል። ህጻናት ተንገላተዋል። ፋኖዎችን አምጣችሁ ውለዱ፡ ደብቃችኋል በሚል መከራ ስቃዩን እየተጋቱት ነው። ዲሞፍተር ለያዘ የአከባቢው ነዋሪ ብረት ለበስ ሰራዊት ተመድቦለታል። ኔትወርክ የለም። ስልክ በመከራ ካልሆነ አይገኝም። የኦሮሚያ ብልጽግና አከባቢውን ከግንኙነት ውጪ አድርጎ እያተራመሰው ነው። ሰሜን ጎንደር ህዝቡ ትንሽ ስለጠነከረበት ወደኋላ አፈግፍጎ በሽማግሌ በኩል እየሞከረ ነው። ይሄ የሽማግሌ ነገር ሀገር እያጠፋ ነው። የአምባገነኖችና ጨቋኞች ድሮን ሆኗል። ሰሜን ሸዋ ህዝቡ የተዘናጋው ሽማግሌዎች ተልከውበት እንደሆነ ሰምተናል። ሰሜን ጎንደር ላይ በእርግጥ የሚሳካ አይመስልም። ህዝቡን በአውራጃና ጎጥ ከፋፍሎ ለመበታተን የተጀመረው ስውር ሴራ ስጋ ለብሶ አማራ ክልል ላይ በመንጎማለል ላይ ነው።

የኦሮሞ ነጻነት ሰራዊት(ሸኔ) ሀይ ባይ አጥቷል። አዲስ አበባ አፍንጫ ስር ያሻውን እያደረገ ነው። የሀዋሳና ጅቡቲ መስመሮችን በአብዛኛው ተቆጣጥሮአቸዋል። ሁለቱ የሀገሪቱ የደም ስር ናቸው የሚባሉት የየብስ ትራንስፖርት መስመሮች በኦሮሞ ነጻነት ሰራዊት በሚፈጸሙ ጥቃቶች ትልቅ የስጋት ቀጠና ሆነዋል። ሰሞኑን በአፋር ክልል አንድ ባለስልጣን ላይ ጨምሮ የተፈጸሙት ግድያዎች የፌደራሉ መንግስት ወይ አቅቶታል፡ አልያም የሆነ የተቆመረ ነገር አለ እንድንል እያስገደዱን ነው። ሞት ተለምዶ ሰዉ ምንም አይመስለውም ይሉናል የምናናግራቸው የአከባቢው ነዋሪዎች። ወደ ሀዋሳ የሚወስደውና እስከሞያሌ የተዘረጋው መስመርም የታጣቂዎች መፈንጪያ ከሆነ ሰነባብቷል። በማታ ጉዞ ከሞት ጋር ቁማር የመጫወት ያህል አደገኛ ሆኗል። በነፍሱ የቆረጠ ካልሆነ በስተቀር ከምሽቱ 12 ሰዓት በኋላ በዚያ መስመር መጓዝ የማይሞከር ሆኗል። መቂ ከተማ ባልታወጀ የአስቸኳይ ጊዜ ውስጥ ሆና የሰዓት ገደብ በመጣል እንቅስቃሴዎችን አቁማለች። የምናናግራቸው ሰዎች በሸኔና በኦሮሚያ ልዩ ሃይል መሀል ልዩነቱ ጠፋብን ይላሉ። ማለያ እየቀያየሩ የሚገድሉትና የሚዘርፉት እነሱ ናቸው ሲሉም ይገልጻሉ። የሚገርመው በሁለቱም መስመሮች ግዙፍ የመከላከያ ሰራዊት ካምፖች በቅርበት መኖራቸው ነው።