ቀጥታ መልእክት ከክርስትያን ታደለ (የህዝብ እንደራሴ) ለአዳነች አቤቤ (የአዲስ አበባ ከንቲባ)

“አያ ጅቦ ሳታመኻኝ ብላኝ” እንዳለው ሰውዬ ገና ዛሬ ከአባባሉ ጋር መሰል ነገር አጋጠመን። አዲስ አበባ ከተማ የኢትዮጵያ ዋና ከተማ፣ የፌደራል መንግስቱ መቀመጫ፣ የሁሉም ብሄሮችና ብሄረሰቦች ባህላዊ እና ማህበራዊ እሴቶች የሚንፀባረቁባት ከተማ ነች ካልን አዲስ አበባ ላይ ሁሉም ወገን ከሌላው ጋር ሊያስተሳስረው የሚችለውን ቋንቋ ባህልና ወግ የማስተዋወቅ እና የማዳበር መብት አለው። ከዚህም አንፃር ቋንቋ አንዱ መገለጫ ነው። ስለዚህ አዲስ አበባ ብቻ ሳይሆን በሁሉም ክልሎች የብሄር ብሄረሰቦች ቋንቋ በማህበረሰቡ ፈቃድ ቢሰጥ ምንም ችግር የለውም። እንደውም ጠቀሜታው የጎላ ነው። ምክንያቱም ቋንቋ ስንቅ ነው። ቋንቋ ስራ ነው። ቋንቋ ወንዝ ያሻግራል ይባላል። ይሁን እንጅ ቋንቋን ለማስተማር ወይም ለማሳወቅ የቋንቋውን ባለቤት ፍላጎት ብቻ ሳይሆን የተማሪውን ወይም ቋንቋውን ለማወቅ ፍላጎት ያለውን ማህበረሰብ መብትና ፍላጎት መረዳት እጅግ አስፈላጊ ነው። አዲስ አበባ ውስጥ እየተካሄደ ያለው ግን ከዚህ በተለዬ ሁኔታ ወ/ሮ አዳነች አበቤ የአዲስ አበባ ከተማን ህዝብ ለማገልገል በከንቲባነት የተቀመጡ ሳይሆን በኦሮሚያው ፕሬዝዳንት በአቶ ሽመልስ አብዲሳ የተመደቡ በአዲስ አበባ የኦሮሚያ ክልል ጉዳይ አስፈፃሚ እስኪመስሉ ድረስ ይህን ያህል በህዝብ ላይ መቆመር እና የማን አለብኝነት ስራ መስራት የበለጠ ዋጋ ያስከፍል እንደሁ እንጅ አንድነትን አያመጣም። ሌላው አዲስ አበባ የሁሉም ብሄሮች እና ብሄረሰቦች ዋና ከተማ ከሆነች ሁሉም ትምህር ቤቶች ውስጥ እንደ ተማሪዎች እና ወላጆቻቸው ፍላጎት በሁሉም የብሄረሰብ ቋንቋ ካሪኩለም ተቀርፆ በእኩልነት መሰጠት አለበት እንጅ አቅም አለኝ ወይም ስልጣን ማማ ላይ እኔ ነኝ የወጣሁት በሚል የትዕቢት አስተሳሰብ በኃይል እና በጉልበት ፍላጎትን መጫን አግባብ አይደለም። ከዚህ በተጨማሪም ቋንቋን ማስተማር እና የአንድን ክልል ባንዲራ እና መዝሙርን በግድ እንዲጠቀሙት ማድረግ በማንአለብኝነት እና ህዝብን ከመናቅ የመነጨ የጥጋብ አስተሳሰብ ድምር ውጤት ነው። ክብርት ከንቲባዋ በእውነት ለመስራት ከፈለጉ እና አዲስ አበባ ውስጥ የተለያዩ የብርሄ ብሄረሰብ ቋንቋዎችን ለዜጎች ማስተማር ከፈለጉ ሁሉንም አንድ ሊያደርግ በሚችለው በኢትዮጵያ ባንዲራ እና በኢትዮጵያ ህዝብ መዝሙር መጠቀም ይችላሉ። ይህ አይሆንም ካሉና በኢትዮጵያ ህዝብ መዝሙርና ባንዲራ አንወከልም ካሉ ህገ መንግስቱን በማሻሻል የከተማ አስተዳደሩ የራሱን የሆነ መዝሙር እና ባንዲራ እንዲቀርፅ ማድረግ ያስፈልጋል። የአንድን ክልል መዝሙርና ባንዲራ አምጥቶ በግድ ብሄር ብሄረሰቦችን ተጠቀሙ ማለት አግባብነት የለውም። ይህም ብቻ ሳይሆን ቢያንስ ቢያንስ ተማሪዎች እንዲዘምሩት የሚፈለገው መዝሙር ተማሪዎቹ በሚረዱት ቋንቋ በግልፅ ተተርጉሞ መልዕክቱን ሊረዱት ግድ ነው። ይህ ካልሆነ እና ዘማሪው ካልገባው የመዝሙሩ ትርጉም እራሱን እና የመጣበትን ማህበረሰብ የሚያንቋሽሽ፣ የሚሰድብ፣ በአሽሙር ፖለቲካዊ ቃላቶችን ተጠቅሞ ወያኔ አመጣሹን የዳቦ ስም በመስጠትና በመጠቀም የዘማሪውን ማህበረሰብ የሚነካ መሆን እና አለመሆኑን ከተማሪ እስከ ወላጅ ድረስ በግልፅ ማወቅና መረዳት አለባቸው። ከዚህ ውጪ የሆነ ተልዕኮ እና አጀንዳ ማስፈፀም ከፈለጉ ግን ክብርት ከንቲባዋ ወደ ኦሮሚያ ክልል መንግስት መስሪያ ቤቶች በመዛወር እዚያው በመስራት መንግስታቸውን ማገልገል ይችላሉ።

 

Besufikad Desta Mulatu