አቶ ክርስቲያን ታደለ ላይ የፌደራል መጀመሪያ ፍርድ ቤት አራዳ ምድብ ችሎት ተጨማሪ 10 ቀናት ጊዜ ቀጠሮ ፈቀደ፤

ፖሊስ ከአሁን ቀደም ተጨማሪ የጊዜ ቀጠሮ የጠየቀባቸውን ምክንያቶች በመጥቀስ ለ3ኛ ጊዜ የ28 ቀን የጊዜ ቀጠሮ ሊሰጠን ይገባል ሲል ፍርድ ቤቱን ጠይቋል፡፡ አቶ ክርስቲያን ታደለ እና ጠበቆቻቸው በበኩላቸው ለፖሊስ በተሰጠው 56 ቀናት ውስጥ በደንበኛቸው ላይ ምንም አይነት ተጨባጭ ነገር አለማቅረቡንና መቅድሙ ላይ አቃቢ ህግ ደንበኛቸውን በተመለከተ ያከናወነውን ዝርዝር ተግባራት ለይቶ አለማስቀመጡን በመጥቀስ ፖሊስ የጠየቀው ተጨማሪ ጊዜ ሊፈቀድለት አይገባም፤ ከተጠረጠሩበት ሽብር ወንጀል ጋር የሚገናኝ ማስረጃ ፖሊስ ባለማቅረቡ ተጠርጣሪው በነፃ ሊለቀቅ ይገባል ሲሉ ተከራክረዋል፡፡

የፌደራል መጀመሪያ ደረጃ ፍርድ ቤት የአራዳ ምድብ ችሎትም የግራ ቀኙን ክርክር ካዳመጠ በኋላ የምርመራ መዝገብንና የግራ ቀኙን ክርክር በማየት ተጨማሪ የምርመራ ቀን ለፓሊስ ሊሰጥ ይገባል ወይስ አይገባም የሚለውን አይቶ ብይን ለመስጠት ለዛሬ ጳጉሜ 5 ቀን 2011 ዓ.ም ተለዋጭ ቀጠሮ ሰጥቶ የነበረ መሆኑ ይታወሳል፡፡

በዚሁ መሰረትም ዛሬ ፓሊስ የምርመራ መዝገቡን ይዞ ቀርቦ ክርክር የተደረገበት ሲሆን ፍርድ ቤቱም ፖሊስ ከጠየቀው 28 ቀን የጊዜ ቀጠሮ ውስጥ 10 ቀን ብቻ በመፍቀድና ፖሊስ የምርመራ መዝገቡን አጠናቆ እንዲያቀርብ በማዘዝ ለመስከረም 9 ቀን 2012 ዓ.ም ከጠዋቱ 4፡00 ተለዋጭ ቀጠሮ ሰጥቷል፡፡

አንድ አማራ ለሁሉም አማራ፤ ሁሉም አማራ ለአንድ አማራ!